انا اتخلصت من زيت القلى فى البيت بنسبة 90|10
انا خلاص ا فى اكتر الاكلات بقيت ابدل القلى بالشوى ودة افضل
اولا للصحة
قللت الكوليسترول لان زيوت القلى فيها نسبة كوليسترول عالية جدا
ثانيا نظافة المطبخ
وانتو عارفين بقة ان القلى دة بيملا البوتاجاز زيت ويمكن ساعات على الارض انما كدة انا خلاص مطبخى نضيف وكمان بوتاجازى مش بيتوسخ خالص
ثالثا التوفير المادى
انا لما وفرت فى استخدام الزيت واستبدلته بالشوى وفرت كتير تمنه وبقيت اشترى بتمنه حاجات تانية لازمة البيت
احكيلكو بقة انا بدلته ازاى
بالنسبة للباذنجان الرومى عشان اعمل مسقعة لازم اقليه
لالالالالالالالالالالا انا خلاص بطلت اقلى
انا بقطعه ترنشات وارش عليه ملح واتركه نصف ساعة وبعدين يكون عندى بخاخة بتاع المية اللى برش بيها الملابس عشان اكويها عندى واحدة خاصة بالمطبخ وبملاها زيت قلى وبس برش على الباذنجان وارصه فى الصينية وادخله الفرن على نارهادية لمدة ربع ساعة
بالنسبة للفلفل الاخضر كمان بقطعه وارشه بالزيت وارصه فى الصينية وادخله الفرن على نار هادية
اما البطاطس المقلى فانا مدمنة بطاطس مقلية وعشان كدة هى كمان بقطعها صوابع بس رفيعة اكتر من اللى بتتقلى فى الزيت دة بتكون ارفع وارق شوية منها وبتبلها بالكاتشب او الشطة والليمون او المستردة زى ما تحبيها واسيبها نص ساعة فى التتبيلة وارشها بالزيت على خفيف وادخلها الفرن بتطلع مقرمشة وجميلة وكمان صحية
اما البانية فدة مشكله لانه عشان تقليه لازم بيض ولازم زيت يعنى كوليسترول بالقوى
انا خلااااااااااااااااااص دلوقت بتبل شرايح البانيه وانقعها فى التتبيلة ووارصها على شبكة وارشها بالزيت على خفيف وافتح عليها الشواية وطبعا يكون تحتها صينية عشان الفرن مش يتبهدل من الفراخ
والاسماك المقلية انا بموت فيها خصوصا لما تكون متبلة تتبيلة حلوةبس هعمل اية مفيش غير الفرن عادى جدا بتبل السمك الفيليه وانقعه فى التتبيلة وبعدين ارشه بالزيت وارصه فى صينية وادخله الفرن
يارب اكون افادتكم
بس ياريت اللى عندها كمان وصفة
نقدر نستبدل بيها زيت القلى رد عليا هنا
عشان نتعاون مع بعض ونقضى على شبح الكوليسترول
موضوع: وداعا لزيوت القلى والكوليسترول 
الأربعاء ديسمبر 16, 2009 10:39 pm
